نہ صرف حسن بہ ہر کیف و کم ہے تجھ پہ فدا
ہے جو بھی عشق بہ شانِ اتم ہے تجھ پہ فدا
نہ بس فداک ابی ، نے فداک امّی بس
ہے اور بھی جو کوئی محترم ہے تجھ پہ فدا
ہے بندگی تو وہی جس میں پیروی ہو تری
کہ ہر ثواب و جزاء و کرم ہے تجھ پہ فدا
طوافِ کعبہ و سعی و سجود و عمرہ و حج
سبھی فدا ہیں حرم پر، حرم ہے تجھ پہ فدا
تو شمعِ محفلِ یزداں تو رونقِ ہستی
ہر اذنِ قربتِ ربِ امم ہے تجھ پہ فدا
نہ کیوں الست پہ قالو ا بلیٰ ہو رب کے لیے
کہ ربِّ کُن کا ہر اک لا ، نعم ہے تجھ پہ فدا
کسی کے فہم میں ہو یا نہ ہو ’’حقیقتِ حق‘‘
ازل سے تا بہ ابد، دم بہ دم ہے تجھ پہ فدا
عجب ہے رمز عَفَااللَّہُ عَنکَ میں کہ جو تو
کسی کا رکھے بھرم تو بھرم ہے تجھ پہ فدا
ہے اک اَنَا بَشَرٌمِّثلِکُم کی وہ بھی شان
کہ سارا عالمِ خلق و نَسم ہے تجھ پہ فدا
فَلَا وَرَبِّکَ لَایُؤمِنُونَ حَتّٰیسے
ملا وہ حُکم کہ اب ہر حَکَم ہے تجھ پہ فدا
کیا ہے صبر و صداقت نے جتنا بھی اونچا
دل و دیانت و دیں کا علم، ہے تجھ پہ فدا
جمالِ صورت و سیرت کمالِ نطق و بیاں
وہ شان جس میں یہ سب ہوں بہم، ہے تجھ پہ فدا
ہے دل میں اَشھَدُ اَن لَّا اِلٰہَ اِلَّا اللّٰہ
تو سر ہے اسمِ محمدؐ پہ خم، ہے تجھ پہ فدا
خوشا دَنیٰ فَتَدَلّٰی فَکَانَ قَابَکہ اور
تھا جو بھی فاصلہ ادنیٰ و کم،ہے تجھ پہ فدا
رسائی تھی ترے در تک مری، میں حاضر ہوں
اب آگے اور مسافت کا غم ہے تجھ پہ فدا
نثار کرنے کو تجھ پہ ہمارے پاس ہے کیا؟
یہ ہم پہ تیرا ہی لطف و کرم ہے تجھ پہ فدا
